The Old English Rune Poem

Feoh biþ frófor · fíra gehwilcum.
Sceal þéah manna gehwilc · miclan hit dælan
gif he wille for dryhtne · dómes hléotan.

Úr biþ ánmód · and oferhyrned,

5

felafrécne déor, · feohteþ mid hornum,
mære mórstapa; · þæt is módig wiht.

Þorn biþ ðearle scearp; · þegna gehwilcum
onfeng is yfel, · ungemetum réþe
manna gehwilcum · þe him mid resteð.

10

Ós biþ ordfruma · ælcre spræce,
wísdomes wráþu · and wítena frofór,
and eorla gehwám · éadnes and tóhiht.

Rád biþ on recede · rinca gehwilcum
séfte, and swíþhwæt · þám þe sitteþ on ufan

15

meare mægenheardum · ofer mílpaþas.

Cén biþ cwicera gehwám · cúþ on fýre,
blác and beorhtlic, · bierneþ oftost
þær híe æþelingas · inne restaþ.

Giefu gumena biþ · gleng and herenys,

20

wráþu and weorþscype, · and wræcna gehwám
ár and ætwist · þe biþ óþra léas.

Wynn ne brúceþ · þe can wana lýt,
sáres and sorge, · and him selfa hæfþ
blæd and blysse · and éac burga geniht.

25

Hagol biþ hwítost corna; · hwyrft hit of heofones lyfte,
wealcaþ hit windes scúra, · weorþeþ hit tó wætere syððan.

Níed biþ nearu on bréostan, · weorþeþ híe þeah oft níþa bearnum
tó helpe and tó hæle gehwæþre, · gif híe his hlystaþ æror.

Ís byþ oferceald, · ungemetum slidor,

30

glisnaþ glæshlútor, · gimmum gelícost,
flór forste geworuht, · fæger ansíene.

Géar biþ gumena hiht, · þonne god læteþ,
hálig heofones cyning, · hrúsan sellan
beorhte bléda · beornum and þearfum.

35

Éoh biþ útan · unsméþe tréow,
heard, hrúsan fæst, · hierde fyres,
wyrtruman underwreþed, · wynn on éþle.

Peorþ biþ symble · plega and hleahtor
wlancum · þar wigan sittaþ

40

on béorsele · blíþe ætsamne.

Eolh-secg eard hæfþ · oftost on fenne,
weaxe on wætere, · wundaþ grimme,
blóde breneð · beorna gehwilcne
þe him ænigne · onfeng gedéð.

45

Sigel sæmannum · simble biþ on hihte,
þonne híe hine fériaþ · ofer fisces bæþ,
oþ híe brimhengest · bringeþ tó lande.

Tir biþ tácna sum, · healdeð tréowa wel
wiþ æþelingas, · á biþ on færylde,

50

ofer nihta genipu · næfre swíceþ.

Beorc biþ bléda léas, · bereþ efne swá þéah
tánas bútan túdor, · biþ on telgum wlitig,
héah on helme · hrysted fægere,
gehlóden léafum, · lyfte getenge.

55

Éh biþ for eorlum · æþelinga wynn,
hors hófum wlanc, · ðær him hæleþ ymbe,
welege on wicgum, · wrixlaþ spræce,
and biþ unstyllum · æfre frofur.

Mann biþ on myrgþe · his mágan léof;

60

sceal þéah ánre gehwilc · óðrum swícan,
for þám dryhten wille · dóme síne
þæt earme flæsc · eorþan betæcan.

Lagu biþ léodum · langsum geþúht,
gif híe sculun néþan · on nacan tealtum,

65

and híe sæýþa · swíþe brégaþ,
and sé brimhengest · brídles ne gíemeð.

Ing wæs ærest · mid Eastdenum
gesewen secgun, · oþ hé siððan eft
ofer wæg gewát, · wæn æfter ran;

70

þus heardingas · þone hæle nemdon.

Dæg biþ dryhtnes sond, · déore mannum,
mære metodes léoht, · myrgþ and tóhiht
éadgum and earmum, · eallum bryce.

Éðel byþ oferleof · æghwylcum men,

75

gif hé mót þær rihtes · and gerisena on
brúcan on bolde · blædum oftost.

Ác biþ on eorþan · ielda bearnum
flæsces fódor, · féreþ gelóme
ofer ganotes bæþ; · gársecg fandaþ

80

hwæþer ác hæbbe · æþele tréowe.

Æsc biþ oferhéah, · ieldum déore,
stiþ on staþole, · stede rihte hielt,
þéah him feohtan on · fíras manige.

Ýr biþ æþelinga · and eorla gehwæs

85

wynn and weorþmynd, · biþ on wicge fæger,
fæstlíc on færelde, · fyrdgeatewa sum.

Íor biþ éafisc, · and þéah a brúceþ
fódres on foldan, · hafaþ fægerne eard,
wætre beworpen, · þær hé wynnum léofaþ.

90

Éar byþ egle · eorla gehwilcun,
þonn fæstlice · flæsc onginneþ,
hræw cólian, · hrúsan ceosan
blác to gebeddan; · bléda gedréosaþ,
wynna gewítaþ, · wera geswícaþ.

Back to AS Rune Poem Page
Back to Rune Page
Back to Home

Home| Runes & Spæ | Discussion Boards | Contact|